黑色食物 = 效益入腎--滋陰黑湯

心血來潮好想飲雞湯

首選當然是滋補不燥的烏雞

御用中醫師曾提點我：「阿女多啲飲烏雞湯，好滋陰」

幸運地，當日在天后買到新鮮烏雞

或者你都知，新鮮烏雞唔係經常有，需要預留，坊間多係冰鮮，煲出來的味道和營養價值梗係新鮮好

黑色食物 = 效益入腎

烏雞湯一般都係配搭紅棗和黑豆（咁啱星期二晚喺電視見到講解），而我會特別加入一款健脾食材，乾貨和新鮮一齊煲，仲要加多一款主食材。

味道？好到驚訝！連我老公飲一啖都話：「果汁嚟㗎喎」佢意思係濃郁香甜得誇張，絕對唔係平時飲到嘅烏雞湯。

「Yoko滋陰黑湯」

新鮮烏雞黑豆淮山湯

☑️補腎 ☑️補血 ☑️健脾胃 ☑️抗疲勞 ☑️維持健康免疫

材料：（約6碗份量）

新鮮烏雞1隻

黑豆4両

新鮮淮山1/3條

乾淮山 8條

紅棗20粒

瘦豬肉半斤

烹調過程：

1）新鮮烏雞沖洗，放在熱水拖水30秒，撈起備用。(建議保留雞皮煲，吸收骨膠原，煲好後才撇油）

2）瘦豬肉汆水，沖洗乾淨。

3）乾淮山及黑豆沖洗，然後浸水20分鐘備用。

4）新鮮淮山去皮切段，沖洗乾淨。（記得要帶手套，因為淮山黏液會容易引起皮膚敏感）

5）紅棗沖洗，剪開去核。

6）全部材料（新鮮淮山除外）放入凍水，大火滾起轉中火蓋上煲2小時。

新鮮淮山在最後半小時才加入。