萬能配搭x健康蒸魚

有人問我：「Yoko有冇食魚油？食咩牌子？」

我答：「唔係每日都食」「揀魚油補充品就建議揀一粒齊集Omega3,6,9」。至於點解唔係每日都補充？因為我呢幾個月keep fit攻略，其中一個方法就係一日內兩餐食魚，唔同品種，所以從天然食物我有足夠吸收魚油。

我經常食魚，食齊好多品種，但都重複又重複，點樣在蒸魚之上fancy啲？增加變化，提升味覺享受，再唔係日日只配香蔥、薑蒜、豉汁、辣椒絲咁單調……

教大家呢個「萬能配搭x 冬菇絲瘦肉絲x 健康蒸魚」，炮製有秘訣，真係好好味又有益：

無論蒸桂花魚、多寶魚、大魚腩、斑仔都好襯，勁好味！對於唔多鍾意食濃魚味的，尤其想氹小朋友食魚，用咗呢個配搭就會易入口，味道多變化!

以下是教大家蒸魚時鋪在上面的-冬菇絲瘦肉絲好味配搭。

［以下步驟，可以整定多啲，放在雪櫃分餐供兩日使用］

1）（每一條魚，我用3隻乾冬菇）乾冬菇去椗及清洗，浸水2小時（水蓋過冬菇便可）。

2）撈起冬菇再清洗一遍，（步驟1）冬菇水留起備用

3）將冬菇放回冬菇水中，加入適量生粉、少許以下調味料-麻油、糖、蠔油、胡椒粉、鹽。然後切絲。

4）瘦肉清洗後索乾水，切絲，加入適量生粉、少許以下調味料-麻油、糖、蠔油、胡椒粉、鹽。

5）下油爆蒜頭、乾蔥頭、薑、蔥，放入肉絲爆香約1分鐘，然後倒入冬菇絲及浸冬菇水，煮約30秒收水。

6）放涼後，（步驟五）可用作鋪在魚上蒸魚。

蒸魚都要加返薑蔥，味道更好。